ಕನ್ನಡ ಚಿತ್ರರಂಗದಲ್ಲಿ ಕ್ರಿಯಾಶೀಲತೆಯ ಸುನಾಮಿ ಎದ್ದಿದೆ ಎನ್ನುವುದಕ್ಕೆ ಮತ್ತೊಂದು ತಾಜಾ ಸಾಕ್ಷಿ “ಗೋಧಿ ಬಣ್ಣ, ಸಾಧಾರಣ ಮೈಕಟ್ಟು” ಚಿತ್ರ. ಹಿರಿಯ ನಟ, ನಿರ್ದೇಶಕರ ಡಾರ್ಲಿಂಗ್ ಅನಂತ್ ನಾಗ್ ಅವರು ಪ್ರಮುಖ ಪಾತ್ರದಲ್ಲಿ ಅಂದರೆ ಸ್ಕಿಜೋಫ್ರಿನಿಯಾ ರೋಗಿಯ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. ಮಿಕ್ಕಂತೆ ರಕ್ಷಿತ್ ಶೆಟ್ಟಿ ಮತ್ತು ಶ್ರುತಿ ಹರಿಹರನ್ ಕಾಣೆಯಾದ ಅನಂತ್ ನಾಗ್ ಅವರ ಹುಡುಕಾಟದಲ್ಲಿ ತೊಡಗಿದ್ದಾರೆ. ಇತ್ತೀಚೆಗೆ ನಾಯಕ ಮತ್ತು ನಾಯಕಿಯ ಪಾತ್ರ ಪರಿಚಯವಿರುವ ವಿಡೀಯೋ ತುಣುಕುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ರಿಲೀಸ್ ಮಾಡಿರುವ ಚಿತ್ರತಂಡ ಸ್ಯಾಂಡಲ್ ವುಡ್ ನಲ್ಲಿ ಮತ್ತೊಂದು ಹೊಸ ಅಲೆಯನ್ನು ಸೃಷ್ಟಿಸುವ ಭರವಸೆಯನ್ನು ನೀಡಿದೆ.
“ಗೋಧಿ ಬಣ್ಣ, ಸಾಧಾರಣ ಮೈಕಟ್ಟಿ”ನ ಕಾಣೆಯಾದ ವ್ಯಕ್ತಿ ನಿಮಗೆ ಸಿಕ್ಕಲ್ಲಿ ದಯವಿಟ್ಟು ಈ ಕೆಳಗಿನ ವ್ಯಕ್ತಿಗಳನ್ನು ಸಂಪರ್ಕಿಸಿ.ಹೇಮಂತ್ ರಾವ್ ನಿರ್ದೇಶಕರು, ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಾಪಕರು, ನಂದಕಿಶೋರ್ ಕ್ಯಾಮೆರಾಮೆನ್, ಚರಣ್ ರಾಜ್ ಸಂಗೀತ ನಿರ್ದೇಶಕರು, ಶ್ರೀಕಾಂತ್ ಸಂಕಲನಕಾರರು. ವರುಷಗಳಿಂದ ಚಿತ್ರೀಕರಣವಾಗುತ್ತಿರುವ “ಗೋಧಿ ಬಣ್ಣ, ಸಾಧಾರಣ ಮೈಕಟ್ಟಿ”ನ ವ್ಯಕ್ತಿ ಅಂದುಕೊಂಡಂತೆ ಆದರೆ ಇನ್ನೊಂದೆರಡು ತಿಂಗಳೊಳಗೆ ಪ್ರೇಕ್ಷಕ ಪ್ರಭುವಿನ ಮುಂದೆ ಕಟಕಟೆಯಲ್ಲಿ ನಿಲ್ಲಲಿದ್ದಾನೆ.
