ಚೆನ್ನೈ: ರಾಷ್ಟ್ರೀಯ ಮಹಿಳಾ ಆಯೋಗದ ಸದಸ್ಯೆ ಮತ್ತು ನಟಿ ಖುಷ್ಬು ಸುಂದರ್ ಅವರು ಎಂಟು ವರ್ಷದವಳಿದ್ದಾಗ ತನ್ನ ತಂದೆಯಿಂದ ದೌರ್ಜನ್ಯಕ್ಕೆ ಒಳಗಾದ ಕರಾಳ ಅನುಭವವನ್ನು ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.
ಮಗುವಿನ ಮೇಲೆ ಲೈಂಗಿಕ ದೌರ್ಜನ್ಯ ನಡೆದಾಗ ಆ ಗಾಯದ ಗುರುತು ಜೀವನ ಪರ್ಯಂತ ಉಳಿಯುತ್ತದೆ ಎಂದ ಖುಷ್ಬು, ಆ ಮಗು ಗಂಡು ಅಥವಾ ಹೆಣ್ಣು ಎಂಬುದು ಮುಖ್ಯವಲ್ಲ ಎಂದು ವಿವರಿಸಿದ್ದಾರೆ.
ತನ್ನ ತಾಯಿಯ ದಾಂಪತ್ಯ ಜೀವನ ಅತ್ಯಂತ ಜೀವನ ಹೀನಾಯವಾಗಿತ್ತು. ತನ್ನ ಹೆಂಡತಿ, ಒಬ್ಬಳೇ ಮಗಳನ್ನು ನಿಂದಿಸುವುದು ತನ್ನ ಜನ್ಮಸಿದ್ಧ ಹಕ್ಕು ಎಂದು ತಂದೆ ಭಾವಿಸಿದ್ದರು. ಎಂಟನೇ ವಯಸ್ಸಿನಿಂದ ನಿರಂತರ ದೌರ್ಜನ್ಯಕ್ಕೊಳಗಾಗಿದ್ದರೂ ವಿಷಯ ಬಹಿರಂಗ ಮಾಡಿದಲ್ಲಿ ತನ್ನ ಕುಟುಂಬದ ಇತರ ಸದಸ್ಯರೂ ದೌರ್ಜನ್ಯಕ್ಕೊಳಗಾಗುತ್ತಾರೆ ಎಂದು ನಾನು ಈ ವಿಷಯವನ್ನು ಎಲ್ಲೂ ಹೇಳಲು ಹೋಗಿರಲಿಲ್ಲ ಎಂದು ತಿಳಿಸಿದ್ದಾರೆ. ತನಗೆ 15 ವರ್ಷವಾದಾಗ ತಂದೆಯ ದೌರ್ಜನ್ಯದ ವಿರುದ್ಧ ಪ್ರತಿರೋಧ ತೋರಲು ಆರಂಭಿಸಿದ್ದಾಗಿ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಆಕೆ ಕೇವಲ 16 ವರ್ಷದವಳಿದ್ದಾಗ ತಂದೆ ಕುಟುಂಬವನ್ನು ತೊರೆದಿದ್ದರು ಎಂಬ ಅಂಶವನ್ನು ಆಕೆ ಸಂದರ್ಶನದಲ್ಲಿ ವಿವರಿಸಿದ್ದಾರೆ.
