News Kannada
Monday, December 05 2022

ನುಡಿಚಿತ್ರ

ಬದಲಾದ ಕಾಲಘಟ್ಟದಲ್ಲಿ ಹುತ್ತರಿ ಮೆಲುಕು!

Photo Credit :

ಬದಲಾದ ಕಾಲಘಟ್ಟದಲ್ಲಿ ಹುತ್ತರಿ ಮೆಲುಕು!

ಮತ್ತೆ ಹುತ್ತರಿ ಹಬ್ಬ ಬಂದಿದೆ. ಇಂದು(ನವೆಂಬರ್ 30) ಕೊಡಗಿನಾದ್ಯಂತ ಹುತ್ತರಿ ಹಬ್ಬವನ್ನು ಕೊರೋನಾ ಆತಂಕದ ನಡುವೆಯೂ ಸಂಪ್ರದಾಯಬದ್ಧವಾಗಿ ಆಚರಿಸಲಾಗುತ್ತಿದೆ. ಹುತ್ತರಿ ಕೊಡಗಿನವರ ಪಾಲಿಗೆ ವರ್ಷದ ಕೊನೆಯ ಹಬ್ಬವಾಗಿದ್ದು, ಧಾನ್ಯ ಲಕ್ಷ್ಮಿ ಭತ್ತವನ್ನು ಮನೆಗೆ ಕೊಂಡೊಯ್ದು ಪೂಜಿಸಿ ಮುಂದಿನ ವರ್ಷದವರೆಗೆ ಕಣಜ ತುಂಬಿರಲಿ ಎಂದು ಪ್ರಾರ್ಥಿಸುವುದು ಹಬ್ಬದ ವಿಶೇಷತೆಯಾಗಿದೆ.

ಕೊಡಗಿನವರ ಪಾಲಿಗೆ ಭತ್ತವೇ ಸರ್ವಸ್ವವಾಗಿದ್ದ ಕಾಲದಲ್ಲಿ ಅದರ ಸುತ್ತಲೇ ಹಬ್ಬ, ಆಚರಣೆಗಳು ಬಂದವು. ಎಲ್ಲಿ ನೀರಿಗೆ ವ್ಯವಸ್ಥೆಯಿದೆಯೋ ಅಲ್ಲೆಲ್ಲ ತನ್ನ ಸಾಮರ್ಥ್ಯಕ್ಕೆ ತಕ್ಕಂತೆ ಗದ್ದೆಗಳನ್ನು ನಿರ್ಮಿಸಿ ಉಳುಮೆ ಮಾಡಿ ಭತ್ತ ಬೆಳೆಯುತ್ತಿದ್ದ ರೈತರು ಭತ್ತ ಮನೆಯ ಕಣಜವನ್ನು ಸದಾ ತುಂಬಿರಬೇಕೆಂದು ಆಶಿಸುತ್ತಿದ್ದರು.

ಭತ್ತದ ಗದ್ದೆ ಉಳುಮೆ ಮಾಡಿ ನಾಟಿ ನೆಡುವುದು, ಅದನ್ನು ಕುಯ್ಲು ಮಾಡಿ ಮನೆಗೆ ತುಂಬಿಸಿಕೊಳ್ಳುವುದು ಎಲ್ಲದರಲ್ಲೂ ಸಂಭ್ರಮ ಕಾಣುತ್ತಿದ್ದರು. ವರ್ಷ ಪೂರ್ತಿ ದುಡಿಮೆಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ರೈತರು ಹಬ್ಬವನ್ನು ಸಡಗರ ಸಂಭ್ರಮದಿಂದ ಆಚರಿಸಿ ತಮ್ಮ ದುಡಿಮೆಯ ಸುಸ್ತನ್ನು ಮರೆಯುತ್ತಿದ್ದರು.

ಅಂದಿನ ಕಾಲದಲ್ಲಿ ಒಂದು ಕುಟುಂಬದವರು ಮತ್ತೊಂದು ಕುಟುಂಬದವರೊಂದಿಗೆ ಸೇರಿ ಕೃಷಿ ಕಾರ್ಯಗಳನ್ನು ಮಾಡುತ್ತಿದ್ದರಿಂದ ನಷ್ಟದ ಮಾತುಗಳು ಕಡಿಮೆಯಿತ್ತು. ವಾಣಿಜ್ಯ ಬೆಳೆಗಳು ಬೆಳೆಗಾರರನ್ನು ಆಕರ್ಷಿಸಿರಲಿಲ್ಲ. ಹಾಗಾಗಿ ಭತ್ತದ ಕೃಷಿಯನ್ನು ಶ್ರದ್ಧೆ, ಪೂಜನೀಯ ಭಾವನೆಯಿಂದ ಮಾಡುತ್ತಿದ್ದರು.

ಅವತ್ತು ಹುತ್ತರಿ ಹಬ್ಬವೆಂದರೆ ಅದೇನೋ ಸಡಗರ, ಸಂಭ್ರಮ ಮನೆಮಾಡುತ್ತಿತ್ತು. ಹಬ್ಬಕ್ಕೆ ತಿಂಗಳು ಇರುವಾಗಲೇ ಮನೆಗೆ ಸುಣ್ಣ, ಬಣ್ಣ ಬಳಿಯುವುದು, ಸೇರಿದಂತೆ ಶುಚಿ ಕಾರ್ಯಮಾಡುತ್ತಾ, ಕಣಕ್ಕೆ ಸೆಗಣಿ ಸಾರಿಸಿ ರಂಗೋಲಿಯಿಟ್ಟು ಹಬ್ಬಕ್ಕೆ ಕಾಯಲಾಗುತ್ತಿತ್ತು.

ಮಕ್ಕಳಿಗೆ ಹಬ್ಬದ ಸಂಭ್ರಮ ಪಟಾಕಿ ಹೊಡೆಯುವ ತವಕ. ಒಟ್ಟಾರೆ ಹುತ್ತರಿ ಎಂದರೆ ಸಂಭ್ರಮ ಸಡಗರ ಎದ್ದು ಕಾಣುತ್ತಿತ್ತು. ಕಾಲಕಾಲಕ್ಕೆ ತಕ್ಕಂತೆ ಮಳೆ, ಬಿಸಿಲು, ಚಳಿ ಎಲ್ಲವೂ ಇದ್ದುದರಿಂದ ಹುತ್ತರಿ ಬರುತ್ತಿದ್ದಂತೆಯೇ ನಡುಕ ಹುಟ್ಟಿಸುವ ಚಳಿ, ಮೈತೋಯ್ದು ಹೋಯಿತೇನೋ ಎಂಬಂತೆ ಸುರಿಯುತ್ತಿದ್ದ ಇಬ್ಬನಿ, ಹಸಿರಾಗಿದ್ದ ಭತ್ತದ ಬೆಳೆ ಹೊಬ್ಬಣ್ಣಕ್ಕೆ ತಿರುಗಿ ತೆನೆ ಬಾಗಿ ಹುತ್ತರಿ ಹಬ್ಬವನ್ನು ಸ್ವಾಗತಿಸಲು ನಿಂತಿದೆಯೇನೋ ಎಂಬಂತೆ ಭಾಸವಾಗುತ್ತಿತ್ತು.

ಸೇನೆಯಲ್ಲಿದ್ದ  ಯೋಧರು ಹಬ್ಬದ ಸಮಯಕ್ಕೆ ಸರಿಯಾಗಿ ರಜೆ ಪಡೆದು ಬರುವ ಪ್ರಯತ್ನ ಮಾಡುತ್ತಿದ್ದರು. ಕೊಡಗಿನಿಂದ ಹೊರಗಿದ್ದು ದುಡಿಯುವ ಮಂದಿಯೂ ತಪ್ಪದೆ ಬರುತ್ತಿದ್ದರು. ಎಲ್ಲರೂ ಕುಟುಂಬದ ಸದಸ್ಯರೊಂದಿಗೆ ಕಲೆತು ಹಬ್ಬ ಆಚರಿಸುತ್ತಿದ್ದರು.

ಇದೆಲ್ಲವೂ ಕೆಲವು ದಶಕಗಳ ಹಿಂದಿನ ಹುತ್ತರಿಯ ಮೆಲುಕುಗಳು.. ಇವತ್ತಿಗೂ ನಾವು ಹಿರಿಯರನ್ನು ಹಬ್ಬದ ಬಗ್ಗೆ ಕೇಳಿದರೆ ಆ ದಿನಗಳ ಸಂಭ್ರಮವನ್ನು ಕಣ್ಣಿಗೆ ಕಟ್ಟಿದಂತೆ ನಮ್ಮ ಮುಂದೆ ತೆರೆದಿಡುತ್ತಾರೆ. ಅವತ್ತಿನ ಹಬ್ಬದ ಸಂಭ್ರಮಕ್ಕೂ ಇವತ್ತಿನ ಹಬ್ಬಕ್ಕೂ ವ್ಯತ್ಯಾಸಗಳಾಗಿದೆ ಎಂಬುದನ್ನು ಒಪ್ಪಲೇ ಬೇಕಾಗಿದೆ.

ಆಧುನಿಕ ಭರಾಟೆ ಹಬ್ಬವನ್ನು ಅದ್ಧೂರಿತನಕ್ಕೆ ಒಳಪಡಿಸಿದೆಯಾದರೂ ನೈಜ ಸಂತೋಷ ಮರೆಯಾಗಿದೆ. ಹಬ್ಬದ ಸಂಪ್ರದಾಯಗಳು ಬದಲಾಗಿ ಒಂದಷ್ಟು ಉಳಿದುಕೊಂಡಿದೆ ಎನ್ನುವುದನ್ನು ಬಿಟ್ಟರೆ ಅದನ್ನು ಮನಸ್ಸುಪೂರ್ತಿ ಒಪ್ಪಿಕೊಳ್ಳುವ ಮನಸ್ಥಿತಿ ಇಲ್ಲವಾಗಿದೆ.

See also  ಕೊಡಗಿನಲ್ಲಿ ಅರ್ಥಪೂರ್ಣ ಸಶಸ್ತ್ರ ಪಡೆಗಳ ಧ್ವಜ ದಿನಾಚರಣೆ

ಕುಟುಂಬಗಳು ಹಂಚಿಹೋಗಿವೆ. ಹಣದ ಹಿಂದೆ ಬಿದ್ದಿರುವ ವ್ಯಕ್ತಿಗಳು ತಮ್ಮ ಕುಟುಂಬದೊಂದಿಗೆ ಸಮಯವನ್ನು ಹಂಚಿಕೊಳ್ಳಲು ತಯಾರಿಲ್ಲ. ಭತ್ತ ಬೆಳೆದು ಅದರಿಂದ ಲಾಭ ಪಡೆಯುವುದು ಸಾಧ್ಯವಿಲ್ಲ ಎಂಬ ಲೆಕ್ಕಚಾರದಿಂದಾಗಿ ನಷ್ಟ ಮಾಡಿಕೊಳ್ಳಲು ತಯಾರಿಲ್ಲದ ಬೆಳೆಗಾರರು ಅದನ್ನು ತೋಟವಾಗಿ ಮಾರ್ಪಡಿಸಿದ್ದಾರೆ. ಜತೆಗೆ ಭತ್ತದ ಬೆಳೆಯತ್ತ ಆಸಕ್ತಿಯೂ ಕಡಿಮೆಯಾಗಿದೆ. ಮಳೆ ಬಾರದೆ ನೀರಿಲ್ಲದೆ ಭತ್ತದ ಕೃಷಿ ಮಾಡಲಾಗದೆ ಪಾಳು ಬಿದ್ದ, ಶುಂಠಿ ಕೃಷಿಗೆ ಬಲಿಯಾಗಿ ಬರಡಾದ, ಕೇರಳದವರ ಗುತ್ತಿಗೆಗೆ ಬಾಳೆತೋಟವಾಗಿ ಮಾರ್ಪಾಡಾದ ಗದ್ದೆಗಳು ಹುತ್ತರಿ ಹಬ್ಬವನ್ನು ಅಣಕಿಸುತ್ತಿವೆ.

ಒಂದಷ್ಟು ಸಂಪ್ರದಾಯಗಳನ್ನು ಉಳಿಸಿಕೊಂಡು ಅದರಂತೆ ಹಬ್ಬವನ್ನು ಆಚರಿಸುವ ಕುಟುಂಬಗಳು ಇವತ್ತಿಗೂ ಕೊಡಗಿನಲ್ಲಿವೆ. ಅವರಿಂದಲೇ ಹಬ್ಬ, ಸಂಪ್ರದಾಯ, ಮನೋರಂಜನೆ ಮೊದಲಿನಂತೆ ಉಳಿದುಕೊಂಡಿದೆ ಎಂದರೆ ತಪ್ಪಾಗಲಾರದು.

ಆಧುನಿಕತೆಯ ಭರಾಟೆ, ವಾಣಿಜ್ಯಬೆಳೆಗಳ ಲಗ್ಗೆ ಸೇರಿದಂತೆ ಹಲವು ವಿದ್ಯಮಾನಗಳಿಂದಾಗಿ ಹುತ್ತರಿ ಹಬ್ಬದ ಆಚರಣೆಯಲ್ಲಿ ಒಂದಷ್ಟು ಬದಲಾವಣೆಯಾಗಿದ್ದರೂ ಹಬ್ಬದ ಬಗೆಗಿನ ಭಾವನಾತ್ಮಕ ಸಂಬಂಧ ಮಾತ್ರ ಕಡಿಮೆಯಾಗಿಲ್ಲ ಎಂಬುದಕ್ಕೆ ತಾವು ಎಲ್ಲಿಯೇ ಇದ್ದರೂ ಹಬ್ಬಕ್ಕಾಗಿ ತವರಿನತ್ತ ಹೊರಡುವ ಕೊಡಗಿನ ಮಂದಿ ಸಾಕ್ಷಿಯಾಗಿದ್ದಾರೆ.

 

ನ್ಯೂಸ್‌ಕನ್ನಡ.ಕಾಂ ಇದರ ಗುಣಮಟ್ಟದ, ಸ್ವತಂತ್ರ ಪತ್ರಿಕೋದ್ಯಮವನ್ನು ನಿಮ್ಮ ದೇಣಿಗೆಯ ಮೂಲಕ ಪ್ರೋತ್ಸಾಹಿಸಿ.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

This site is protected by reCAPTCHA and the Google Privacy Policy and Terms of Service apply.

Leave a Reply

Your email address will not be published.

177
Lava Kumar

Read More Articles

Subscribe Newsletter

Get latest news karnataka updates on your email.

ವಾಟ್ಸಪ್ ನಲ್ಲಿ ತಾಜಾ ಸುದ್ದಿಗಳನ್ನು ಪಡೆಯಲು ದಯವಿಟ್ಟು