ಮಂಗಳೂರು: ಹೊಡೆದಾಟ ಪ್ರಕರಣದಲ್ಲಿ ಬಂಧಿತಳಾಗಿರುವಂತಹ ಚೈತ್ರಾ ಕುಂದಾಪುರ ವಿರುದ್ಧ ಸುಳ್ಯ ನ್ಯಾಯಾಲಯದ ನ್ಯಾಯಾಧೀಶರು ಗರಂ ಆದ ಘಟನೆಯು ಸೋಮವಾರ ನಡೆದಿದೆ.
ನ.3ರಂದು ಸುಳ್ಯ ನ್ಯಾಯಾಲಯದಲ್ಲಿ ನಡೆದ ವಿಚಾರಣೆಗೆ ಚೈತ್ರಾ ಕುಂದಾಪುರ ಅನಾರೋಗ್ಯದ ನೆಪವೊಡ್ಡಿ ಹಾಜರಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಆ್ಯಂಬುಲೆನ್ಸ್ ಮೂಲಕ ಕರೆತಂದು ಹಾಜರುಪಡಿಸಿ, ವೈದ್ಯರ ಪ್ರಮಾಣಪತ್ರ ನೀಡಬೇಕೆಂದು ನ್ಯಾಯಾಧೀಶರು ಆದೇಶಿಸಿದ್ದರು.
ಆದರೆ ಇಂದು ಆ್ಯಂಬುಲೆನ್ಸ್ ಬದಲು ಪೊಲೀಸ್ ವಾಹನದಲ್ಲೇ ಬಂದ ಚೈತ್ರಾ ವಿರುದ್ಧ ಗರಂ ಆದ ನ್ಯಾಯಾಧೀಶರು ಸ್ವಲ್ಪ ಬುದ್ಧಿಮಾತು ಹೇಳಿದರು.
ಅನಾರೋಗ್ಯ ನೆಪವೊಡ್ಡಿ ವಿಚಾರಣೆಗೆ ಹಾಜರಾಗದೆ ಇರುವುದು ನ್ಯಾಯಾಂಗ ವ್ಯವಸ್ಥೆಗೆ ಮಾಡುವ ಅಪಚಾರ. ನೀನು ನಾಟಕವಾಡಬೇಡ ಎಂದು ಹೇಳಿ, ಹೊಡೆದಾಟವೆಲ್ಲಾ ಬಿಟ್ಟು ಒಳ್ಳೆಯ ರೀತಿಯಿಂದ ಇರು ಎಂದರು.
ಅ.24ರಂದು ಸುಬ್ರಹ್ಮಣ್ಯ ದೇವಾಲಯ ಹಾಗೂ ನರಸಿಂಹ ಮಠದ ವಿವಾದದ ವಿಚಾರವಾಗಿ ಚೈತ್ರಾ ಕುಂದಾಪುರ ಬೆಂಬಲಿಗರು ಮತ್ತು ಹಿಂದೂ ಸಂಘಟನೆಯ ಗುರುಪ್ರಸಾದ್ ಪಂಜ ನಡುವೆ ಬೀದಿ ಕಾಳಗ ನಡೆದಿತ್ತು. ಇದರ ಬಳಿಕ ಚೈತ್ರಾ ಕುಂದಾಪು ಮತ್ತು ಇತರ ಆರು ಮಂದಿಯನ್ನು ಪೊಲೀಸರು ಬಂಧಿಸಿದ್ದರು.
ಇದೇ ಪ್ರಕರಣದಲ್ಲಿ ಗುರುಪ್ರಸಾದ್ ಪಂಜ ವಿರುದ್ಧ ಮಾನಭಂಗ ಹಾಗೂ ದರೋಡೆ ದೂರನ್ನು ಚೈತ್ರಾ ಕುಂದಾಪುರ ದಾಖಲಿಸಿದ್ದರು. ಅ.31ರಂದು ಪೊಲೀಸರು ಗುರುಪ್ರಸಾದ್ ಪಂಜ ಅವರನ್ನು ಬಂಧಿಸಿತ್ತು. ನ್ಯಾಯಾಲಯವು ಅವರಿಗೆ ಷರತ್ತುಬದ್ಧ ಜಾಮೀನು ನೀಡಿದೆ.