ಮಂಗಳೂರು: ತುಂಬೆ ಡ್ಯಾಂ ನೀರಿನ ಮಟ್ಟ ಕನಿಷ್ಠ ಮಟ್ಟಕ್ಕೆ ಕುಸಿದಿದ್ದು, 2019ರಲ್ಲಿ ನಗರದಲ್ಲಿ ಉಂಟಾಗಿದ್ದ ನೀರಿನ ಹಾಹಾಕಾರ ಉಂಟಾಗದಿರಲಿ ಎಂದು ಜನರು ಮಾತನಾಡಿಕೊಳ್ಳುತ್ತಿದ್ದಾರೆ.
ಮಂಗಳವಾರ 3.06 ಮೀಟರ್ ಇದ್ದ ನೀರಿನ ಮಟ್ಟ ಬುಧವಾರ 2.98ಕ್ಕೆ ಇಳಿಕೆಯಾಗಿದೆ. ಸದ್ಯದ ನೀರಿನ ಸ್ಥಿತಿ ನೋಡಿದಲ್ಲಿ ಕೇವಲ ಒಂದು ವಾರಗಳ ಕಾಲ ಮಾತ್ರ ನಗರಕ್ಕೆ ನೀರು ಪೂರೈಸಬಹುದು. ಆ ವೇಳೆಗೆ ಮಳೆ ಆರಂಭವಾಗಬಹುದು ಎನ್ನುವ ನಿರೀಕ್ಷೆ ಇದೆ.
2019ರಲ್ಲಿ ಇದಕ್ಕಿಂತಲೂ ಹೆಚ್ಚಾಗಿ ನೀರಿನ ಸಮಸ್ಯೆ ಉಂಟಾಗಿತ್ತು. 2019ರಲ್ಲಿ ಏಪ್ರಿಲ್ 11ರಿಂದಲೇ ರೇಶನಿಂಗ್ ಆರಂಭಗೊಂಡಿತ್ತು. ಆದರೆ ಆ ಬಾರಿ 5.5 ಮೀಟರ್ನಷ್ಟು ನೀರಿನ ಮಟ್ಟ ಇತ್ತು. ಬಳಿಕದ ವರ್ಷಗಳಲ್ಲಿ ನೀರು ಹೆಚ್ಚಾಗಿ ಸುರಿದ ಪರಿಣಾಮ ರೇಶನಿಂಗ್ ಮಾಡುವ ಅಗತ್ಯ ಕಂಡುಬಂದಿರಲಿಲ್ಲ.