ಹೊಸದಿಲ್ಲಿ: ಮಾ.10ರಿಂದ ಆರಂಭವಾಗಲಿರುವ ಎಫ್ಐಎಚ್ ಹಾಕಿ ಪ್ರೊ ಲೀಗ್ ಮುಂಚಿತವಾಗಿ ಭಾರತೀಯ ಪುರುಷರ ಹಾಕಿ ತಂಡದ ನೂತನ ಮುಖ್ಯ ಕೋಚ್ ಆಗಿ ಕ್ರೇಗ್ ಫುಲ್ಟನ್ ಅವರನ್ನು ನೇಮಕ ಮಾಡಲಾಗಿದೆ ಎಂದು ಹಾಕಿ ಇಂಡಿಯಾ ಸಂಸ್ಥೆ ಶುಕ್ರವಾರ ಪ್ರಕಟಿಸಿದೆ.
ಸುಮಾರು 25 ವರ್ಷಗಳ ಕೋಚಿಂಗ್ ಅನುಭವ ಹೊಂದಿರುವ 48 ವರ್ಷದ ದಕ್ಷಿಣ ಆಫ್ರಿಕಾದ ಆಟಗಾರ ಕ್ರೇಗ್ ಫುಲ್ಟನ್ ಆದಷ್ಟು ಶೀಘ್ರ ತಂಡವನ್ನು ಸೇರಿಕೊಳ್ಳಲಿದ್ದಾರೆ ಎಂದು ಹಾಕಿ ಇಂಡಿಯಾ ಪ್ರಕಟಣೆಯಲ್ಲಿ ತಿಳಿಸಿದೆ.
2014 ರಿಂದ 2018 ರವರೆಗೆ ಐರ್ಲೆಂಡ್ ಪುರುಷರ ತಂಡವು ರಿಯೋ ಒಲಿಂಪಿಕ್ ಕ್ರೀಡಾಕೂಟ 2016 ಕ್ಕೆ ಅರ್ಹತೆ ಪಡೆದಾಗ ಮುಖ್ಯ ತರಬೇತುದಾರರಾಗಿ ಕೆಲಸ ಮಾಡಿದ್ದರು. ಈ ಐತಿಹಾಸಿಕ ಸಾಧನೆಯು ಅವರಿಗೆ ೨೦೧೫ ರಲ್ಲಿ ವರ್ಷದ ಎಫ್ಐಎಚ್ ತರಬೇತುದಾರ ಪ್ರಶಸ್ತಿಯನ್ನು ಗೆದ್ದುಕೊಟ್ಟಿತು.
ಅವರು ಹಾಲಿ ಒಲಿಂಪಿಕ್ ಚಾಂಪಿಯನ್ ಬೆಲ್ಜಿಯಂನೊಂದಿಗೆ ಸಹಾಯಕ ತರಬೇತುದಾರರಾಗಿ ಕೆಲಸ ಮಾಡಿದ್ದಾರೆ. ಅಲ್ಲಿ ತಂಡವು ಟೋಕಿಯೊದಲ್ಲಿ ಚಿನ್ನದ ಪದಕವನ್ನು ಗೆದ್ದಿತ್ತು. ಭುವನೇಶ್ವರದಲ್ಲಿ 2018 ರಲ್ಲಿ ತಂಡವು ವಿಶ್ವಕಪ್ ಪಡೆದಾಗ ಅವರು ಬೆಲ್ಜಿಯಂ ತಂಡದ ಕೋಚಿಂಗ್ ತಂಡದಲ್ಲಿದ್ದರು.
