ಕೋವಿಡ್ ನ ಹೊಸ ರೂಪಾಂತರಿ ತಳಿ ಒಮಿಕ್ರಾನ್ ಸೋಂಕಿನ ಭೀತಿ ಹೆಚ್ಚಾಗುತ್ತಿದ್ದು, ಸೋಂಕಿತ ಪ್ರಕರಣಗಳನ್ನು ಆದಷ್ಟು ಬೇಗ ಪತ್ತೆ ಮಾಡಲು ಸಹಕಾರಿಯಾಗುವಂತಹ ಕಿಟ್ ವೊಂದನ್ನು ಐಸಿಎಂಆರ್ ಅಭಿವೃದ್ಧಿಪಡಿಸಿದೆ.
ಈ ಕಿಟ್ ಅನ್ನು ವಿಜ್ಞಾನಿ ಡಾ. ಬಿಸ್ವಜ್ಯೋತಿ ಬೋರ್ಕಕೋಟಿ ನೇತೃತ್ವದಲ್ಲಿ ಈಶಾನ್ಯ ಪ್ರಾಂತ್ಯದ ಪ್ರದೇಶಿಕ ವೈದ್ಯಕೀಯ ಸಂಶೋಧನಾ ಕೇಂದ್ರದ ವಿಜ್ಞಾನಿಗಳ ತಂಡ ಸಿದ್ಧಪಡಿಸಿದೆ. ಶಂಕಿತ ವ್ಯಕ್ತಿಯಿಂದ ಸಂಗ್ರಹಿಸಿದ ಮಾದರಿಯಲ್ಲಿ ಒಮಿಕ್ರಾನ್ ಸೋಂಕು ಇರುವುದನ್ನು ಕೇವಲ ಎರಡು ಗಂಟೆಯಲ್ಲಿ ಪತ್ತೆ ಮಾಡಬಹುದಾದ ಯಂತ್ರ ಇದಾಗಿದೆ.
ಈ ಬಗ್ಗೆ ಮಾತನಾಡಿದ ಡಾ. ಬಿಸ್ವಜ್ಯೋತಿ ಅವರು, ಐಸಿಎಂಆರ್ ಹಾಗೂ ಆರ್ ಎಂಅರ್ ಸಿ ತಂಡ ಒಮಿಕ್ರಾನ್ ಪತ್ತೆಗಾಗಿ ಆರ್ಟಿಪಿಸಿಆರ್ ಪರೀಕ್ಷೆಗಾಗಿ ಕಿಟ್ ಅಭಿವೃದ್ಧಿಪಡಿಸಿದೆ. ಸಾರ್ವಜನಿಕ ಮತ್ತು ಖಾಸಗಿ ಸಹಭಾಗಿತ್ವವಿರುವ ಜಿಸಿಸಿ ಬಯೋಟೆಕ್ ಸಂಸ್ಥೆ ಈ ಕಿಟ್ ತಯಾರಿಸುತ್ತಿದೆ. ಇದರಲ್ಲಿ ಶೇ.100ರಷ್ಟು ನಿಖರ ಫಲಿತಾಂಶ ಸಿಗಲಿದೆ ಎಂದರು.
ಸದ್ಯ ಕೋವಿಡ್ ಸೋಂಕು ಪತ್ತೆ ಮಾಡಲು 36 ಗಂಟೆಗಳ ಸಮಯಾವಕಾಶ ಬೇಕಾಗಿದ್ದು, ರೂಪಾಂತರಿ ಒಮಿಕ್ರಾನ್ ಸೋಂಕು ಪತ್ತೆ ಮಾಡಲು 4-5 ದಿನಗಳು ಅಗತ್ಯವಿದೆ. ಇಂತಹ ಸನ್ನಿವೇಶದಲ್ಲಿ ಈ ಕಿಟ್ ಸಹಕಾರಿಯಾಗಲಿದೆ ಎಂದರು.
