ನವದೆಹಲಿ: ಮಂಗಳವಾರ ಪ್ರಕಟವಾದ ಕೇಂದ್ರ ಲೋಕಸೇವಾ ಆಯೋಗದ ಪರೀಕ್ಷೆಗಳಲ್ಲಿ ಇಶಿತಾ ಕಿಶೋರ್ ಅಗ್ರಸ್ಥಾನ ಗಳಿಸಿದ್ದಾರೆ. ಕುತೂಹಲಕಾರಿಯಾಗಿ, ಪರೀಕ್ಷೆಯಲ್ಲಿ ಎಲ್ಲಾ ಮೊದಲ ನಾಲ್ಕು ರ್ಯಾಂಕ್ಗಳನ್ನು ಮಹಿಳೆಯರೇ ಪಡೆದುಕೊಂಡಿದ್ದಾರೆ.
ಯುಪಿಎಸ್ಸಿ ಪ್ರಕಾರ, ಈ ಬಾರಿ ಒಟ್ಟು 933 ಅಭ್ಯರ್ಥಿಗಳನ್ನು ನೇಮಕಾತಿಗೆ ಶಿಫಾರಸು ಮಾಡಲಾಗಿದ್ದು, ಅದರಲ್ಲಿ 183 ಮಂದಿ ಐಎಎಸ್ ಅಧಿಕಾರಿಗಳಾಗಿ ಆಯ್ಕೆಯಾಗಿದ್ದಾರೆ. 933 ರಲ್ಲಿ 345 ಸಾಮಾನ್ಯ ವರ್ಗದಿಂದ, 99 ಆರ್ಥಿಕ ದುರ್ಬಲ ವರ್ಗದಿಂದ, 263 ಒಬಿಸಿ, 154 ಪರಿಶಿಷ್ಟ ಜಾತಿ ಮತ್ತು 72 ಪರಿಶಿಷ್ಟ ಪಂಗಡದ ವರ್ಗದಿಂದ ಆಯ್ಕೆಯಾಗಿದ್ದಾರೆ.
ಇಶಿತಾ ಕಿಶೋರ್ ಪರೀಕ್ಷೆಯಲ್ಲಿ ಅಗ್ರಸ್ಥಾನದಲ್ಲಿದ್ದರೆ, ಗರಿಮಾ ಲೋಹಿಯಾ ಎರಡನೇ ರ್ಯಾಂಕ್ ಪಡೆದರೆ, ಉಮಾ ಹರತಿ (ತೃತೀಯ), ಸ್ಮೃತಿ ಮಿಶ್ರಾ (ನಾಲ್ಕನೇ), ಮಯೂರ್ ಹಜಾರಿಕಾ (ಐದನೇ), ಗಹ್ನಾ ನವ್ಯಾ ಜೇಮ್ಸ್ (ಆರನೇ), ವಸೀಮ್ ಅಹ್ಮದ್ ಭಟ್ (ಏಳನೇ), ಅನಿರುದ್ಧ್ ಯಾದವ್ (ಎಂಟನೇ ಸ್ಥಾನ) ), ಕನಿಕಾ ಗೋಯಲ್ (ಒಂಬತ್ತನೇ) ಮತ್ತು ರಾಹುಲ್ ಶ್ರೀವಾಸ್ತವ (ಹತ್ತನೇ) ಸ್ಥಾನ ಪಡೆದಿದ್ದಾರೆ. ಪರೀಕ್ಷೆಯಲ್ಲಿ ಅಭ್ಯರ್ಥಿಗಳು ಎಷ್ಟು ಅಂಕ ಗಳಿಸಿದ್ದಾರೆ ಎಂಬುದನ್ನು 15 ದಿನಗಳ ನಂತರ ಪ್ರಕಟಿಸಲಾಗುವುದು. ಆಯೋಗವು 178 ಅಭ್ಯರ್ಥಿಗಳ ಮೀಸಲು ಪಟ್ಟಿಯನ್ನು ಸಹ ಸಿದ್ಧಪಡಿಸಿದೆ. ಐಎಎಸ್ ಹುದ್ದೆಗಳಿಗೆ ನೇಮಕಾತಿಗಾಗಿ 180 ಅಭ್ಯರ್ಥಿಗಳನ್ನು ಶಾರ್ಟ್ಲಿಸ್ಟ್ ಮಾಡಲಾಗಿದೆ. 2,589 ಅಭ್ಯರ್ಥಿಗಳಿಗೆ ಮೂರು ಹಂತಗಳಲ್ಲಿ ಸಂದರ್ಶನ ನಡೆಸಿತ್ತು. ಮೂರನೇ ಮತ್ತು ಅಂತಿಮ ಹಂತದ ಸಂದರ್ಶನವನ್ನು ಮೇ 18 ರಂದು ನಡೆಸಲಾಯಿತು.