ಬಾಗ್ದಾದ್ : ಕಳೆದ 24 ಗಂಟೆಗಳಲ್ಲಿ ಇರಾಕ್ನ ಪೂರ್ವ ಪ್ರಾಂತ್ಯದ ದಿಯಾಲಾದಲ್ಲಿ ಐಎಸ್ ಅಡಗುತಾಣಗಳನ್ನು ಗುರಿಯಾಗಿಸಿಕೊಂಡು ನಡೆಸಿದ ದಾಳಿಯಲ್ಲಿ ಕನಿಷ್ಠ 10 ಇಸ್ಲಾಮಿಕ್ ಸ್ಟೇಟ್ (ಐಎಸ್) ಉಗ್ರರು ಹತರಾಗಿದ್ದಾರೆ ಎಂದು ಇರಾಕ್ ಮಿಲಿಟರಿ ತಿಳಿಸಿದೆ.
ಗುಪ್ತಚರ ವರದಿಗಳ ಆಧಾರದ ಮೇಲೆ, ಇರಾಕಿನ ವಾಯುಪಡೆಗಳು ಶುಕ್ರವಾರ ಮತ್ತು ಶನಿವಾರದಂದು ಉತ್ತರ ದಿಯಾಲಾದ ಹಿಮ್ರೀನ್ ಪರ್ವತ ಶ್ರೇಣಿಯ ಐಎಸ್ ಅಡಗುತಾಣಗಳ ಮೇಲೆ ವೈಮಾನಿಕ ದಾಳಿ ನಡೆಸಿದ್ದು, ಅಡಗುತಾಣಗಳನ್ನು ನಾಶಪಡಿಸಿವೆ. ಒಟ್ಟು ಏಳು ಐಎಸ್ ಉಗ್ರರನ್ನು ಕೊಂದಿವೆ ಎಂದು ಭದ್ರತಾ ಮಾಧ್ಯಮ ಕೋಶವು ಶನಿವಾರ ಹೊರಡಿಸಿದ ಹೇಳಿಕೆಯಲ್ಲಿ ತಿಳಿಸಿದೆ.
ರಾಜಧಾನಿ ಬಾಗ್ದಾದ್ನ ಉತ್ತರಕ್ಕೆ ಸುಮಾರು 250 ಕಿಮೀ ದೂರದಲ್ಲಿರುವ ಪ್ರಾಂತೀಯ ರಾಜಧಾನಿ ಕಿರ್ಕುಕ್ನ ನೈಋತ್ಯ ಭಾಗದಲ್ಲಿರುವ ವಾಡಿ ಅಲ್-ಶೇಯ ಒರಟಾದ ಪ್ರದೇಶದಲ್ಲಿ ಐಎಸ್ ಅಡಗುತಾಣದ ಮೇಲೆ ಯುದ್ಧವಿಮಾನಗಳು ಬಾಂಬ್ ದಾಳಿ ನಡೆಸಿದವು, ಅಡಗುತಾಣವನ್ನು ಧ್ವಂಸಗೊಳಿಸಿದೆ ಮತ್ತು ಒಳಗಿದ್ದ ಎಲ್ಲಾ ಉಗ್ರರನ್ನು ಕೊಂದಿದೆ ಎಂದು ಜೆಒಸಿ ಪ್ರತ್ಯೇಕ ಹೇಳಿಕೆಯಲ್ಲಿ ತಿಳಿಸಿದೆ.
2017 ರಲ್ಲಿ ಐಎಸ್ ಸೋಲಿನ ನಂತರ ಇರಾಕ್ನಲ್ಲಿನ ಭದ್ರತಾ ಪರಿಸ್ಥಿತಿಯು ಸುಧಾರಿಸಿದೆ. ಆದಾಗ್ಯೂ, ಐಎಸ್ ಕೆಲ ಗುಂಪುಗಳು ನಗರ ಕೇಂದ್ರಗಳು, ಮರುಭೂಮಿಗಳು ಮತ್ತು ಒರಟಾದ ಪ್ರದೇಶಗಳಲ್ಲಿ ಭದ್ರತಾ ಪಡೆಗಳು ಮತ್ತು ನಾಗರಿಕರ ವಿರುದ್ಧ ಆಗಾಗ್ಗೆ ಗೆರಿಲ್ಲಾ ದಾಳಿಗಳನ್ನು ನಡೆಸುತ್ತಿವೆ.