ಬೀಜಿಂಗ್: ಚೀನಾದಲ್ಲಿ ಕಳೆದ 24 ಗಂಟೆ ಅವಧಿಯಲ್ಲಿ ಕೋವಿಡ್-19 ದೃಢಪಟ್ಟ 101 ಪ್ರಕರಣಗಳು ಪತ್ತೆಯಾಗಿವೆ.ಈ ಪೈಕಿ 65 ಪ್ರಕರಣಗಳು ಆಂತರಿಕ ಮಂಗೋಲಿಯಾ ಪ್ರಾಂತ್ಯದಲ್ಲಿ ವರದಿಯಾಗಿವೆ. ಜಿಯಾಂಗ್ಸುವಿನಲ್ಲಿ 16, ಲಿಯಾನಿಂಗ್‌ನಲ್ಲಿ 9, ಗೌಂಗ್‌ಡಾಂಗ್‌ನಲ್ಲಿ 8 ಮತ್ತು ಯುನ್ನಾನ್‌ನಲ್ಲಿ 3 ಪ್ರಕರಣಗಳು ದೃಢಪಟ್ಟಿವೆ.
ಆದರೆ, ಯಾರೊಬ್ಬರೂ ಸೋಂಕಿನಿಂದ ಮೃತಪಟ್ಟಿಲ್ಲ ಎಂದು ಅಲ್ಲಿನ ರಾಷ್ಟ್ರೀಯ ಆರೋಗ್ಯ ಆಯೋಗ ತಿಳಿಸಿರುವುದಾಗಿ ಭಾನುವಾರ ವರದಿಯಾಗಿದೆ.
ಚೀನಾದಲ್ಲಿ ‘ಶೂನ್ಯ ಕೋವಿಡ್-19 ನೀತಿ’ ರೂಪಿಸಿರುವುದರ ಹೊರತಾಗಿಯೂ, ಅಲ್ಲಿನ ಹಲವು ಪ್ರಾಂತ್ಯಗಳಲ್ಲಿ ಸೋಂಕು ಪ್ರಕರಣಗಳು ವರದಿಯಾಗುತ್ತಿವೆ. ಶನಿವಾರ 94 ಮಂದಿಗೆ ಸೋಂಕು ಖಚಿತವಾಗಿತ್ತು.
ಮಾಧ್ಯಮಗಳ ವರದಿ ಪ್ರಕಾರ, ಬೀಜಿಂಗ್, ಹೀಲಾಂಗ್‌ಜಿಯಾಂಗ್ ಮತ್ತು ಇತರ ಪ್ರದೇಶಗಳಲ್ಲಿ ಕೋವಿಡ್ ಪರಿಸ್ಥಿತಿ ಈಗಲೂ ನಿಯಂತ್ರಣದಲ್ಲಿಲ್ಲ ಎನ್ನಲಾಗಿದೆ. ಶೆನ್‌ಝೆನ್‌, ಗೌಂಗ್‌ಝೌ, ಯುನ್‌ಫು, ಹುಯಿಝೌ, ಹೆಯುವಾನ್, ಮೀಝೌ, ಬೈಸ್‌, ನಾನ್‌ನಿಂಗ್, ಶಾಒಯಾಂಗ್ ನಗರಗಳಲ್ಲಿ ಹಾಗೂ ದಕ್ಷಿಣದ ಪ್ರಾಂತ್ಯಗಳಾದ ಗೌಂಗ್‌ಡಾಂಗ್‌, ಗೌಂಗ್‌ಕ್ಸಿ ಮತ್ತು ಹುನಾನ್‌ ಪ್ರಾಂತ್ಯಗಳಲ್ಲಿ ಸೋಂಕು ಪ್ರಕರಣಗಳು ಹೆಚ್ಚುತ್ತಿವೆ.
ಚೀನಾದಲ್ಲಿ ನಡೆಯುವ ವಸಂತ ಕಾಲದ ಹಬ್ಬಗಳ ಸಂದರ್ಭದಲ್ಲಿ ಸೋಂಕು ಪ್ರಕರಣಗಳು ಏಕಾಏಕಿ ಹೆಚ್ಚಾಗುವ ಅಪಾಯವಿದೆ.
