ಸಿಯೋಲ್: ದಕ್ಷಿಣ ಕೊರಿಯಾದ ವಿಮಾನ ನಿಲ್ದಾಣದಲ್ಲಿ ಇಳಿಯುವ ಮುನ್ನ ಏಷಿಯಾನ ಏರ್ಲೈನ್ಸ್ ವಿಮಾನದ ಬಾಗಿಲು ತೆರೆದ ಪ್ರಯಾಣಿಕನ ಬಗ್ಗೆ ಮಾಧ್ಯಮಗಳಲ್ಲಿ ಸುದ್ದಿಯಾಗಿತ್ತು. ಈ ಬಗ್ಗೆ ವಿಚಾರಣೆ ನಡೆಸಿದ ಪೊಲೀಸರಿಗೆ ಆತ ಹೇಳಿದ್ದಿಷ್ಟು ನನಗೆ ವಿಮಾನದಲ್ಲಿ ಉಸಿರುಗಟ್ಟಿದಂತಾಗಿತ್ತು. ಅದಕ್ಕಾಗಿ ಬೇಗ ಇಳಿಯಬೇಕು ಎಂದೆನಿಸಿತು ಹಾಗಾಗಿ ಬಾಗಿಲು ತೆರೆದೆ ಎಂದು ಹೇಳಿದ್ದಾರೆ.
ಶುಕ್ರವಾರ, ಸಿಯೋಲ್ನಿಂದ ಆಗ್ನೇಯಕ್ಕೆ 237 ಕಿಮೀ ದೂರದಲ್ಲಿರುವ ಡೇಗು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿಯುವ ಮೊದಲು ವಿಮಾನದ ಬಾಗಿಲನ್ನು ಪ್ರಯಾಣಿಕ ತೆರೆದಿದ್ದರು. ಈ ಕೆಲಸ ಮಾಡಿದ್ದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದರು. ವಿಚಾರಣೆ ವೇಳೆ ಪ್ರಯಾಣಿಕ ಮೇಲಿನಂತೆ ವಿವರಣೆ ನೀಡಿದ್ದಾರೆ ಎಂದು ಯೋನ್ಹಾಪ್ ನ್ಯೂಸ್ ಏಜೆನ್ಸಿ ವರದಿ ಮಾಡಿದೆ.
ತಾನು ಇತ್ತೀಚೆಗೆ ಕೆಲಸ ಕಳೆದುಕೊಂಡಿದ್ದೆ ನಂತರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದೆ ಎಂದು ಹೇಳಿದ್ದಾರೆ. ಅಲ್ಲದೆ ವಿಮಾನದಿಂದ ಬೇಗನೆ ಹೊರಬರಲು ಬಯಸಿದ್ದರಿಂದ ಬಾಗಿಲು ತೆರೆದಿದ್ದೇನೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಘಟನೆಯಲ್ಲಿ ವಿಮಾನದಲ್ಲಿದ್ದ 194 ಜನರಲ್ಲಿ ಯಾರೊಬ್ಬರೂ ಕೆಳಗೆ ಬಿದ್ದಿಲ್ಲ ಅಥವಾ ಗಾಯಗೊಂಡಿಲ್ಲ, ಆದರೆ 12 ಪ್ರಯಾಣಿಕರು ಆತಂಕದಿಂದ ಉಸಿರಾಟ ಸಮಸ್ಯೆ ಎದುರಿಸಿದ್ದರು. ಹಲವರನ್ನು ಇದಕ್ಕಾಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ವಿಮಾನವು ಜೆಜುನಿಂದ ಡೇಗುಗೆ ತೆರಳುತ್ತಿತ್ತು.