ಕೋಲ್ಕತಾ: ಭಾರತೀಯ ವನಿತಾ ಕ್ರಿಕೆಟ್ ತಂಡದ ಮಾಜಿ ನಾಯಕಿ, ಆಲ್ರೌಂಡರ್ ರುಮೇಲಿ ಧರ್‌ ಎಲ್ಲ ಮಾದರಿಯ ಕ್ರಿಕೆಟಿಗೆ ಬುಧವಾರ ಗುಡ್‌ಬೈ ಹೇಳಿದರು.
38 ವರ್ಷದ ರುಮೇಲಿ ಧರ್‌ ಭಾರತದ ಪರ 4 ಟೆಸ್ಟ್, 78 ಏಕದಿನ ಹಾಗೂ 18 ಟಿ20 ಪಂದ್ಯಗಳಲ್ಲಿ ಆಡಿದ್ದಾರೆ.
ಸುದೀರ್ಘ 6 ವರ್ಷಗಳ ವಿರಾಮದ ಬಳಿಕ 2018ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ಪುನರಾಗಮನ ಆಗಿದ್ದರು. ಅಂದು ಗಾಯಾಳು ಜೂಲನ್‌ ಗೋಸ್ವಾಮಿ ಬದಲು ಭಾರತ ತಂಡವನ್ನು ಪ್ರವೇಶಿಸಿ ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಸರಣಿಯಲ್ಲಿ ಪಾಲ್ಗೊಂಡಿದ್ದರು. 2005ರ ಏಕದಿನ ವಿಶ್ವಕಪ್‌ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಭಾರತ ಫೈನಲ್‌ ತಲುಪುವಲ್ಲಿ ರುಮೇಲಿ ಧರ್‌ ಪಾತ್ರ ವಹಿಸಿದ್ದರು.
2003ರಲ್ಲಿ ಇಂಗ್ಲೆಂಡ್‌ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ಪದಾರ್ಪಣೆಗೈದಿದ್ದ, ರುಮೇಲಿ ಧರ್‌ ಟೆಸ್ಟ್ ಕ್ರಿಕೆಟ್‌ನಲ್ಲಿ 236 ರನ್‌ ಹಾಗೂ 8 ವಿಕೆಟ್‌; ಏಕದಿನದಲ್ಲಿ 961 ರನ್‌ ಮತ್ತು 63 ವಿಕೆಟ್‌; ಟಿ20ಯಲ್ಲಿ 131 ರನ್‌ ಹಾಗೂ 13 ವಿಕೆಟ್‌ ಸಂಪಾದಿಸಿದ್ದಾರೆ.
